ភ្នំពេញ៖ រដ្ឋមន្រ្តីក្រសួងធម្មការ និងសាសនា លោក ចាយ បូរិន នាយប់ថ្ងៃទី២៦ ខែកុម្ភៈ ឆ្នាំ២០២៤ បានចេញសេចក្តីសម្រេច ដោយប្រគល់ភារកិច្ចថ្វាយ-ប្រគេន សម្តេចព្រះមហាសុមេធាធិបតី កិត្តិឧទ្ទេសបណ្ឌិត នន្ទ ង៉ែត ជាសម្តេចព្រះសង្ឃរាជស្តីទីនៃព្រះរាជាណាចក្រកម្ពុជា។

ជាមួយគ្នានេះសម្តេចព្រះពោធិវ័ង្សកិត្តិបណ្ឌិត អំ លឹមហេង ទទួលភារកិច្ចជាសម្តេចព្រះសង្ឃនាយកស្តីទីគណៈមហានិកាយ នៃព្រះរាជាណាចក្រកម្ពុជា។

សម្តេចមហាសង្ឃរាជ ទេព វង្ស យាងចូលទិវង្គត នាល្ងាចម៉ោង៥ និង៤០នាទីថ្ងៃទី២៦ ខែកុម្ភៈ ឆ្នាំ២០២៤ នៅវត្តឧណ្ណាលោម ក្នុងព្រះជន្មាយុ ៩៣ព្រះវស្សា។

សម្តេចមហាសង្ឃរាជ ទេព វង្ស ប្រសូតនៅថ្ងៃទី១២ ខែមករា ឆ្នាំ១៩៣២ នៅក្នុងឃុំជ្រាវ ស្រុកប្រាសាទបាគង ខេត្តសៀមរាប។ ព្រះអង្គបានបួសនៅក្នងសំណាក់ព្រះឧបជ្ឈាយ៍ព្រះនាម ហ៊ីង ម៉ៅ ពុទ្ធសរ ព្រះសមុហ៍ ព្រះចៅអធិការវត្តរាជបូណ៌ ខេត្តសៀមរាប។ ព្រះអង្គទ្រង់បានបួសជាលើកទី២ នៅថ្ងៃទី១៩ ខែកញ្ញា ឆ្នាំ១៩៧៩ នៅវត្តឧណ្ណាលោម រាជធានីភ្នំពេញ ក្នុងសំណាក់ព្រះឧបជ្ឈាយ៍ បិតសីលោ៕